La Marche de Savoye
Dantorn al 1685 ël giovo Vitòrio Amedé II ëd Savòja a l’avìa vorsù fé compon-e na batterie con soa marcia (da bate an sij tamborn e da soné con j’oboé) ch’a valièissa da sigla për ij sò regiment d’ordinansa.
Cost’incombensa a l’era pijassla Jean-Baptiste de Lully, musicista dla cort ëd Versailles, antlora a l’apogé ‘d soa cariera. Lully a l’avìa componù dun-a le quatr batùe dla batërìa e peui, na vòta che coste a j’ero stàite agradìe da Turin, le sinch arie ‘d compagnament dj’oboé. Parèj a l’é nassùa la marca sonora dla part pì gorëgna dl’armèja ‘d Soa Autëssa, costituì dai regiment Vardie, Savòja e Piemont, visadì ‘l signal ëd cola ch’a së s-ciamava La Generala. Costa a rolava a minca vent ëd guèra, a nunsiava la mobilitassion general an cola stagion che, da la dërota dë Stafarda (1690) a le vitòrie ‘d Turin (1706) e dl’Assieta (1747) a l’avrìa portà a l’emancipassion ëd j’Ëstat ëd Savòja da la Fransa.
Costa a l’é la mùsica la pì antica ‘d nòsta tradission ch’a l’é evocatriss, an tan che arcòrd ëstòrich e d’afession, d’un sentiment nassional ch’a l’era già nòstr antlora e che noi i sentoma nòstr ancheuj.
Apress l’Imn dij Pais-Bass, ch’a l’é stàit ëscrivù dantorn al 1570, la Marche de Savoye a l’é l’Imn nassional ël pì antich dël mond.
Adatament da G. Bonino, Repertorio di musiche del tempo di Luigi XIV in uso presso unità militari partecipanti all’assedio e alla battaglia di Torino del 1706, an Torino 1706, memorie e attualità etc., Atti del Convegno, Torino 20 e 30.9.2006, Vol. I, Torino 2007. Consulensa stòrica: Associazione per la valorizzazione della Storia e tradizione del vecchio Piemonte. Deliberassion dël Consèj ëd Gioventura Piemontèisa, a Turin a j’8 ëd Fërvé dël 2009.
A l’é già provedusse, an sla base djë spartì dl’época, a fé eseguì le trascrission e j’arangiament për j’esecussion ant le vàire formassion musicaj.
La propòsta d’andoté la Marche de Savoye coma imn ëd la Region Piemont a l’é stàita presentà a j’autorità regionaj ai 9 ëd luj dël 2009.
tratto da http://www.gioventurapiemonteisa.net/